الخروف الأسترالي

سمعت خبر غريب جدا النهارده......... استراليا امتنعت عن تصدير خرافها وعجولها لنا - لمصر - لحد هنا مفيش مانع!! يمكن جايلهم سعر اكبر - برضه اكل العيش مر، ودي بلد ووراها مصاريف - لكن لما تبقى بتمنتع رغم عدم وجود اخرين!! يشتروا منها الطلبية يبقى فيه سبب!!!! ولازم هيكون سبب غريب تعالوا كده نعرف ايه السبب؟

السبب ان الاستراليين عرفوا اننا بنعامل الحيوانات بطريقة غير لائقة وليس فيها رحمة من اول شحنها من بلادهم في سفن وهما مزنقين في بعض وصولا الى المدبح وايقاعها على الأرض وذبحها بطريقة بعيدة كل البعد عن الرفق، لدرجة ان بعض بتوع الرفق بالحيوان من السياح راحوا المدبح وصوروا من هناك لقطات جر الخراف و العجول ثم ايقاعها على الأرض وذبحها امام بعضها البعض

زي ما نكون مش مسلمين ولا ديننا نزل به شروط الذبح الرحيمة الجميلة التي منها

عدم ذبح الحيوان امام حيوان آخر

ان لا يرى الحيوان الذي مازال لم يذبح الدم

الذبح بسكين مسن جيدا

اراحة الحيوان وعدم ايلامه

وشروط اخرى لااذكرها

عموما مش موضوعنا ده ممكن ميفرقش مع الجدعان عندنا هنا

وكمان ان مجموعة السياح اللي صوروا الفيلم في الدبح ضغطوا على حكومتهم ومنعوها من تصدير حيوانات الذبح لنا برضه وايه يعني ولا يهمنا

انا كل اللي هاممني ان الخروف الاسترالي له كرامة عننا

حكومته عملت له قيمة ومرضيتش تصدره لنا

وعجبي على زمن فيه الخروف اغلى من الانسان